وبلىستىق پوليتسيا دەپارتامەنتى ءباسپاسوز قىزمەتىنىڭ دەرەگىنە قاراعاندا, ەرلى-زايىپتىنىڭ ولىمىنە قاتىستى قىلمىسقا ماحامبەت اۋدانىنىڭ 29 جاستاعى تۇرعىنى كۇدىكتى رەتىندە تانىلىپ وتىر.
«ەرلى-زايىپتىنىڭ قىزى مەن بالاسى ءىز-ءتۇزسىز جوعالۋ دەرەگىمەن ىزدەستىرىلىپ جاتىر. ال كۇيەۋ بالاسىنا ەل اۋماعىندا بولماۋىنا بايلانىستى حالىقارالىق ىزدەۋ جاريالاندى. كۇدىكتىنىڭ ايەلى – مۇردەسى تابىلعان ەرلى-زايىپتىنىڭ قىزى ءىز-ءتۇزسىز جوعالعان. ونى ىزدەۋ قولعا الىندى», دەپ حابارلادى دەپارتامەنتتىڭ ءباسپاسوز قىزمەتى.
الەۋمەتتىك جەلىدە ەرلى-زايىپتىنىڭ 1990 جىلعى قىزى ميرامگۇلدىڭ مۇردەسى تابىلدى دەگەن اقپارات تاراعان ەدى. الايدا, دەپارتامەنتتىڭ ءباسپاسوز قىزمەتى بۇل اقپاراتتى جوققا شىعاردى.
«ەرلى-زايىپتىنىڭ مۇگەدەك قىزىنىڭ كوشە كامەراسىنا تۇسكەنى راس. پوليتسيا قىزمەتكەرلەرى بۇل دەرەكتى تەكسەرىپ, زەردەلەۋ جۇرگىزىپ جاتىر. مۇنداي دەرەكتىڭ ءبارى سوتقا دەيىنگى تەرگەۋ ماتەريالدارىنا تىركەلەدى», دەپ مالىمدەدى دەپارتامەنتتىڭ ءباسپاسوز قىزمەتىنەن.
ەسكە سالايىق, ءىز-ءتۇزسىز جوعالىپ كەتكەن اتىراۋلىق ەرلى-زايىپتى جەر قوينىنا تاپسىرىلدى.
كەيىنىرەك, جوعالعان وتباسىنىڭ قىزى مەن بالاسىن سۇڭگۋىرلەر ىزدەپ, تابا الماعانى حابارلاندى.
